طبعا العنوان غريب بس لما نشوف الموضوع دا هنعرف معنى العنوان دا كويس

طبعا كلنا بيجي رمضان والعزومات ومن بعديه العيد والزيارات ومش بس كدا طول ايام السنة بيبقى كل واحد عاوز بيته زي الفل نضيف لو ورقة ع الأرض بيشيلها وممكن يعمل مشكلة لو البيت مش نضيف او غرفته او مش منظمه ... دا حال أغلب بيوتنا والبيوت المصري

طيب تعالى نبص لبيوت الله المساجد لو دا بيتك هتعمل فيه ايه اكيد هتهتم فيه طيب تخيل دا بيت ربنا

ناس كتير عملت حملات ننضف الكلية ننضم المرافق العامة طيب وبيوت ربنا ترضى يكون بالحال السئ اللي عليه بعض المساجد والبعض الذي امتد للغالب طبعا الكلام مش عام فيه مساجد في اماكن بتكون نظيفة مكيفة وزي الفل وتمام بس في نفس الوقت في مساجد محتاجه عنايه ونظافة بعض الشئ

الحملة اللي احتارت في اسمها وبصراحه الأسم مجاش إلا وانا بكتب الموضوع وطلع زي ما مكتوب كدا

بيتي نظيف بس ... !!

في الحملة دي بإذن الله في الأجازة هنهتم ببيوت الله بحد أقصى مسجد كل ثلاثة أيام وبالأتفاق مع المجموعة

طيب مين المجموعة دي ... المجموعة دي كل واحد قرا الموضوع وعجبته الفكرة انا وانت وصحابك في نفس البلد

عاوزين مجموعة في كل بلد مني ومنك ومن صحابك اللي معانا في الكلية وبراها هنروح مسجد من المساجد وننظفه بكل الوسائل الممكنة اكننا بنضف بيت من بيوتنا وأحسن وبإذن الله الناس اللي مسئولة عن المساجد لما تلاقينا بنعمل كدا هتحس بأهمية دا وهتعمل بنفسها وتهتم بالمسجد دا

اي رائيكم في الفكرة ... كويسة ولا لأ ... وهتشارك فيها ولا لأ ؟؟

الموضوع مش محتاج فلوس تذكر ولا هنجمع فلوس هنجمع اشخاص في كل بلد

ها هتبدأ معانا ولا لأ ؟؟